Հայ Եկեղեցւոյ Ծիսական Հարցերու Յանձնախումբին Հանդիպումը` Անթիլիասի Մէջ
Չորեքշաբթի, 26 յունիս 2013-ին, Հայ եկեղեցւոյ ծիսական բարեկարգման յանձնախումբը, Ամենայն
հայոց Գարեգին Բ. կաթողիկոսի եւ Մեծի Տանն Կիլիկիոյ Արամ Ա. կաթողիկոսի օրհնութեամբ,
իր հերթական հանդիպումին սկսաւ Անթիլիասի մայրավանքին մէջ: Ամենայն հայոց կաթողիկոսութեան
կողմէ սոյն յանձնախումբին անդամներն են Միքայէլ եպս. Աջապահեան, Արշակ եպս. Խաչատրեան,
Վահան եպս. Յովհաննէսեան եւ Զաքարիա վրդ. Բաղումեան: Իսկ Մեծի Տանն Կիլիկիոյ կաթողիկոսութեան
կողմէ` Կոմիտաս արք. Օհանեան, Գեղամ արք. Խաչերեան եւ Գրիգոր Ծ. վրդ. Չիֆթճեան: Հիւրաբար
հանդիպումներուն իրենց մասնակցութիւնը կը բերեն Վարուժան արք. Հերկելեանն ու Նարեկ արք.
Ալեէմեզեանը: Կոստանդնուպոլսոյ պատրիարքութեան կողմէ` Թաթուլ վրդ. Անուշեան: Յանձնախումբը
իր աշխատանքները պիտի շարունակէ յառաջիկայ երկու օրերուն ալ` վերջնական բնագիր եւ բացատրական
ուղեցոյց մը ներկայացնելու համար Եպիսկոպոսաց ժողովին: Կէսօրին, ժողովի մասնակիցները
ճաշի հիւրը եղան վեհափառ հայրապետին, որ կարեւորութեամբ շեշտեց յառաջիկայ Եպիսկոպոսաց
ժողովի գումարման անհրաժեշտութիւնը եւ այդ ծիրին մէջ հայ եկեղեցւոյ ծիսական բարեկարգութեան
հրամայականը: